Mokolo mwa 25 ya decembe tokosepela eyenga ya Mbotama ya Mokonzi wa bisu Yezu Kristu. Nkwankolo ya bankoko ikoyebisa bisu 'te Yezu abotami o ndako ya bibwele. Santo Francisco abandi kupalinginya lisolo lyango o mokili mwa Italia. Mosantu Bonaventura ayebisi bisu makambo ma bomoi bwa santu Francisco. Asangeleli bisu 'te Francisco asepeli mingi mokolo, ye mpenza na baninga ba ye, basepeli kukundola mbotama ya Yezu zonga zonga na elielo o kati ya mobenga, esika nyama ikolalaka na butu. Balingaki mpe kotiya mpunda na ngombe mobali penepene na elielo. Ezalaki esika ya bosawa kasi batu bayike bakokaki kuzala wana mpe kusepela na bango elongo eyenga ya Mbotama ya Yezu. Francisco atii elielo wana mpe atondisi yango na matiti makauki. O kati ya matiti atii ekeko ya mwana Yezu. Monfulele Leo ayeli mpe abaneli mpunda na ngombe mobali. Francisco alobi na Leo : "Na bomoni yango, batu basengeli kuyoka mpe kutongolo malamu bolingi bonene bwa Nzambe, lokola Ye andimi kukoma motu bongo mpo 'te abikisa bisu na masumu, alatisa bisu elamba bopeto ya libiki mpe afungolela bisu nzila ya bomoi bwa lobiko.

Bakristu basepeli bongo mpo ya mbala ya yambo mbotama ya Yezu na kati ya butu. O nsima monfulele Leo asololeli 'te azwi limoni wana. O kati ya elielo amoni mwana kitoko mpenza. Mwana atandeli Francisco maboko mpe Francisco akangi ye, alalisi Ye pene na bontolu bwa ye. Na nsima alalisi mwana lisusu o kati ya matiti makauki o elielo mpe alobi : "Monfulele Leo, okengele mwana awa. Ngai mpenza nakokende kuteya batu bakomi awa. Bazalaki bayike mpe bazilaki wana liboso lya mobenga.

Francisco asololi mingi mpo ya ngondo mosantu María, alobi:  "María akolulaka 'te motema mwa batu mokoma elielo mpo 'te Yezu abotama o mitema mya bango."  Alakisi batu boniboni bamilengele 'te bayamba Yezu na motema mobongi nye. María azali mama wa Yezu solo, kasi mokolo mosusu Mokonzi Yezu alobi:  "Motu akosalaka maye Tata wa ngai o likolo alingi, azali ndeko wa ngai wa mobali mpe wa mwasi na mpe mama wa ngai. Mateo 12, 50

Kosala maye Tata alingi !   Bolingi bwa Nzambe bokolakisa bisu nzila ndenge na ndenge :  - Eleko ya boyoki misa tokeba malamu na boyoki Nsango Ndamu mpe tosala lokola Yezu alobeli bisu !   - Tolinga baninga na motema mobimba !   - Tokabola mbongo ya bisu na babola !   - Tolimbisana mpe tokata bondeko na batu banso o nzila ya bisu !  - Tomipima mposa ya nzotu !   - Toboya masenginya makolulisa bisu mambi ma nse eye, mambi makokamba bisu o nzila 'te tóangana ntina ya bomoi bwa bisu !   Wana mbeba ikotinda bisu 'te tobosana bolingi Nzambe, bolingi boye bokokangisa bisu na Yezu, mwana  wa Nzambe, Mobikisi mpe Mobenisi wa nse mobimba.

Tomituna soko Santo María, mama wa bisu wa likolo, akoki kutia motema mwa ye o likolo lya bisu. Tokondima solo 'te Yezu ábotama o mitema mya bisu mokolo mwa eyenga ya mbotama? Tolingi solo mpenza kusepelisa María na boyambi Yezu o motema mwa bisu?  Soko bongo, bisu banso ndetozwi bobenisi bwa Ye. O nzila ena tokobanda kubongisa nse eye mpe ndetofandi banso elongo na nsai mpe na esengo.

O nsima Francisco atii libaya o likolo lya elielo mpe asambeli losambo la Ukaristiya. Motema mwa ye motondaki na nsai. Ayembi nsango ndamu ya mbotama ya Yezu o Beteleme. Mpizoli ya esengo ibimeli batu o misu... Lisapo lyoko likosakola 'te, na nsima ya eyenga ya mbotama, nyama iye iliaki matiti ma elielo ibikaki na bokono bwa bango. Ntembe te, Nzambe alingaki kukumisa mosaleli wa Ye mosantu, mpe na makamwisi alakisi nguya ya ngrasia ya ye ntangu andimi nsambo ya Santu Francisco.

Nzambe ayokisi bisu nsai enene mpe apesi bisu elikya ya solo na bokomi motu lokola bisu. Bakisa 'te alakeli 'te akokabela bisu bomoi bwa ye,  bomoi bwa Nzambe mpenza. Ntina ya bomoi bwa Yezu ezalaka 'te bisu mpenza totonda na bomoi bwa Yemei. Boye aluli 'te, o nsima ya liwa, bisu mpe tosangola bomoi bwa lobiko. Yemei alakisi bisu nzila. Ayoki mpasi ya kuruse mpo ya bisu mpe asekwi mpo 'te azwa bomoi bwa lobiko. Alakeli bisu : Esika ngai nakokende, mosaleli wa ngai mpe akozala na ngai elongo. Wana nde elembo ya bolingo bonene bwa Nzambe mpo ya bisu !  Motu moko té aleki oyo akokaba bomoi bwa ye mpo ya libiki lya baninga.

Yango wana, liboso 'te tosepela eyenga ya mbotama o ndako ya bisu, liboso 'te tokabola makabo na bandeko o mokolo moye, topesa lokumu na Nzambe, tosangana na bakristu o ndako Nzambe mpo ya kosambela losambo la Ukaristiya. Lotomo la bisu la yambo yango wana. Eyamba ezali nkita ya bomoi bwa bisu. Motuya mwa eyamba moleki mbongo na mpe nkita inso zambi ekobomba ebotiseli ya bomoi bwa lobiko. Solo, eyamba ya bisu tosengeli kulakisa yango na misala mya bisu, mpe esengeli kumonono na ezalela ya bisu bakristu. O nzila ena tokosepelisa mokonzi Yezu Kristu na mpe baninga ba bisu banso.

Tosepela eyenga ya mbotama, miinda mya nzete ya mbotama mílola mpe mingenge, nzembo eyokama, tosepela na nsai !...  Kasi, ókanisa mpe ómanyola boniboni miinda mya langi ya nzete ya bomoi bwa bisu mizali :  - bosangani na Nzambe,  - bolamu na bolingani,   - bompikiliki ona bisumei mpe ona basusu,  - bosembo, boyokani mpe boboto.

Soko bongo, Mosantu Maria akondima 'te tosambela na ye elongo :  Molimu mwa ngai mokokumisa Mokonzi na motema mobimba.  Motema mwa ngai motondi na nsai mpo ya Nzambe, Mobikisi wa ngai. Asali ngai mambi manene engebene na mokano mwa Ye mpo ya ngai. Nkombo ya Ye: Mosantu ! Luka 1, 46

Eyenga ya nsai ya mbotama ya Yezu

Sango André Loyson, Chaussée de Ninove 548, 1070 Bruxelles, Belgique  www.hoogdagartikel.com